Një shembje dheu në rrugën "Don Shtjefën Kurti" në Prishtinë ka lënë pa furnizim me energji elektrike një pjesë të konsumatorëve në kryeqytet.
Sipas njoftimit zyrtar të KOSTT-it, incidenti ka dëmtuar infrastrukturën energjetike dhe ka prekur rrjetin transmetues në nivelin 110 kV, duke ndikuar drejtpërdrejt nënstacionin NS Prishtina 6.
Ekipet teknike të KOSTT-it, në bashkëpunim me KEDS, ndodhen në terren dhe po punojnë për sanimin e dëmeve si dhe rikthimin e furnizimit me energji elektrike sa më shpejt të jetë e mundur.
Një burim tjetër e lidh shembjen me zonën e Veternik-ut në Prishtinë.
KOSTT ka kërkuar mirëkuptim nga qytetarët e prekur.
Policia bën thirrje që qytetarët të tregojnë kujdes në zonat e prekura dhe të ndjekin udhëzimet e ekipeve në vendngjarje.
Përditësime
Ujësjellësi Prishtina ka ndërprerë furnizimin me ujë në rrugët Mehmet Shpendi, Bislim Islami, Don Shtjefën Kurti, Kiri, Agim Prodani, Ymer Bytyqi dhe Visar Thaqi.
Këto rrugë janë të bllokuara plotësisht për automjetet dhe këmbësorët. Zona rrethohet nga ekipet e Emergjencës, Inspekcionit, KEDS, Ujësjellësit dhe Policisë.
KEDS nuk ka dhënë njoftim paraprak dhe nuk është përgjigjur ndaj ankesave të qytetarëve.
Autoritetet kanë filluar punimet për mbushjen e gropës me rërë në rrugën “Don Shtjefën Kurti”.
Zhvillime të tjera:
- Banorët raportojnë rrezik të vazhdueshëm shembjeje të mëtejshme dhe situatë të rrezikshme pranë trafos 110 kV.
- “Lagjen e Spitalit” dhe Qendra Studentore kanë qenë pa rrymë për gati 9 orë.
- Trafik i rënduar tek Qendra Studentore për shkak të semaforëve jashtë funksionit; Policia drejton manualisht.
KOSTT konfirmoi se nuk arriti të rikthejë furnizimin me energji gjatë mbrëmjes dhe nuk pritet rikthim gjatë natës për arsye sigurie dhe nevojën për sigurimin e terrenit.
Situata kërkon hapa shtesë teknikë për stabilizimin e terrenit para ndërhyrjeve të mëtejshme.
KOSTT falënderon qytetarët për mirëkuptimin.
KOSTT riktheu furnizimin me energji elektrike në zonat e prekura me një zgjidhje të përkohshme.
Ekipet e KOSTT vazhdojnë punën për sigurinë e plotë të Nënstacionit Prishtina 6 pas dëmeve të konsiderueshme.