Pas disa ditësh në gjendje kritike, 17-vjeçari Mateo Likaj nuk ka mundur t'u mbijetojë plagëve të marra nga një shkrepje aksidentale e armës së zjarrit. Ngjarja ndodhi më 24 maj në banesën e 19-vjeçarit Rigels Sylaj, në zonën e Kthesës së Kamzës.
Sipas hetimeve, grupi i të rinjve ishte duke konsumuar alkool kur Rigels Sylaj u tregoi të pranishmëve një armë zjarri pa leje. Duke mos qenë në dijeni se arma ishte e mbushur, autori ia drejtoi atë 17-vjeçarit dhe e qëlloi aksidentalisht në kokë.
Në dëshmitë e para, të pranishmit kishin deklaruar se kishin dëgjuar të shtëna nga jashtë dhe e kishin gjetur 17-vjeçarin të plagosur në oborr. Më pas, ata kanë ndryshuar versionin e ngjarjes duke pranuar se incidenti kishte ndodhur brenda banesës.
Rigels Sylaj u arrestua fillimisht për plagosje të rëndë me dashje, ndërsa pas vdekjes së viktimës pritet rëndimi i masës së akuzës. Gjithashtu, në pranga janë vënë edhe dy persona të tjerë, të cilët akuzohen për kryerjen e veprimeve që pengojnë zbulimin e së vërtetës.