Një ngjarje e rëndë me armë zjarri është regjistruar gjatë orëve të para të mëngjesit në rrugën “Berit Beker” në Tiranë. Një 17-vjeçar është transportuar për në Spitalin e Traumës në gjendje të rëndë, pasi është qëlluar aksidentalisht me pistoletë nga shoku i tij, 19-vjeçari Rigers Sylaj.
Sipas hetimeve paraprake të policisë, ngjarja ndodhi ndërsa katër të rinjtë ishin mbledhur në banesën e autorit. Rigers Sylaj po u tregonte shokëve pistoletën, të cilën e mbante pa leje, dhe duke menduar se arma nuk kishte fishek në fole, e shkrepi atë pa dashje. Plumbi ka goditur 17-vjeçarin në kokë.
Fillimisht, të rinjtë e pranishëm kanë tentuar të shmangin përgjegjësinë duke pretenduar se kishin dëgjuar të shtëna jashtë dhe e kishin gjetur shokun të plagosur në oborr. Megjithatë, gjatë marrjes në pyetje nga hetuesit, ata kanë ndryshuar dëshminë, duke pranuar rrethanat e vërteta të incidentit.
Policia ka finalizuar arrestimin në flagrancë të tre personave:
- Rigers Sylaj, 19 vjeç, i akuzuar për “Plagosje të rëndë nga pakujdesia”, “Mbajtje pa leje e armëve dhe municionit luftarak” dhe “Veprime që pengojnë zbulimin e së vërtetës”.
- A. V., 20 vjeç, i akuzuar për “Veprime që pengojnë zbulimin e së vërtetës”.
- H. H., 22 vjeç, i akuzuar për “Veprime që pengojnë zbulimin e së vërtetës”.
Arma e zjarrit është sekuestruar në cilësinë e provës materiale, ndërsa hetimet për dokumentimin e plotë të rastit vazhdojnë nën drejtimin e Prokurorisë.