Egzon Bytyçi, 26-vjeçari i cili ndodhej nën trajtim mjekësor pas ngjarjes së rëndë të 23 gushtit në Malishevë, ka ndërruar jetë në orët e pasdites së 27 gushtit 2026. Lajmi është konfirmuar për mediat nga zëdhënësi i Policisë së Kosovës për rajonin e Gjakovës, Sheremet Elezaj, i cili bëri të ditur se vdekja ndodhi në Qendrën Klinike Universitare të Kosovës (QKUK) rreth orës 17:15.
Ngjarja ku humbi jetën çifti i ri ndodhi në dhomën e gjumit të banesës së tyre në fshatin Kërvasari. Jetlira Foniqi, 25 vjeçe, e cila ishte shtatzënë në javën e 34-të, humbi jetën si pasojë e plagëve nga arma e zjarrit pak kohë pas mbërritjes në spital. I dyshuari, pas vrasjes së bashkëshortes, dyshohet se kishte qëlluar veten me të njëjtën armë, duke mbetur fillimisht në gjendje kritike për jetën përpara se të ndërronte jetë sot.
Prokuroria Themelore në Gjakovë e kishte iniciuar rastin si "Vrasje e rëndë" dhe "Mbajtje në pronësi, kontroll ose posedim të paautorizuar të armëve". Procedurat hetimore vijojnë në koordinim me prokurorin kompetent për të zbardhur rrethanat e plota të ngjarjes. Për motivet, mediat kanë raportuar për dyshime mbi xhelozinë dhe konflikte të mundshme mes çiftit, si dhe pretendime për probleme të mëparshme të shëndetit mendor të të dyshuarit, të cilat nuk janë verifikuar ende nga autoritetet policore.
Përditësime
Mjeku Shaqir Uka nga Klinika Intensive konfirmoi se i dyshuari kishte pësuar plagë në regjionin e kokës. Ministrja në detyrë e Drejtësisë, Donika Gërvalla, kërkoi hetim maksimal për zbardhjen e rrethanave të ngjarjes. Rrjeti i Grave të Kosovës kërkoi masa urgjente parandaluese kundër dhunës, duke theksuar se nga viti 2010 deri në gusht 2026, në Kosovë janë vrarë 63 gra, sipas statistikave të Policisë së Kosovës.