Një ngjarje e rëndë ka tronditur komunitetin shqiptar në ishullin e Kretës, në Greqi. Roland Sala, 33 vjeç, ka ndërruar jetë pas një incidenti në det. I riu, me origjinë nga Peshkopia e Dibrës, jetonte prej vitesh në Angli dhe kishte udhëtuar drejt Greqisë për të kaluar pushimet pranë familjarëve të tij.
Gjatë kohës që po qëndronte në plazh në zonën e Rethimnos, i riu u përfshi nga dallgët e detit dhe pësoi asfiksi. Pas nxjerrjes nga uji, ai u dërgua me urgjencë në Spitalin e Rethimnos, ku qëndroi nën kujdesin intensiv të mjekëve për rreth dy javë, duke luftuar për jetën. Pavarësisht përpjekjeve të stafit mjekësor, ai nuk mundi të mbijetonte.
Komuniteti Shqiptar në Rethimno ka njoftuar se trupi i pajetë i të ndjerit do të niset sot, më 28 korrik, në orën 18:00, nga Spitali i Rethimnos drejt Shqipërisë, për t’u përcjellë më pas në banesën e fundit në vendlindje.
Përmes një mesazhi ngushëllues, Komuniteti Shqiptar në Rethimno u shprehu ngushëllimet më të sinqerta familjes, të afërmve dhe miqve për këtë humbje të rëndë, duke u shprehur: "Lamtumirë, Roland Sala! Kujtimi yt do të mbetet i paharruar në zemrat e të gjithë atyre që të njohën. I qoftë i lehtë dheu i tokës mëmë".