Ismajl Jashari, ish-kryetari i Komunës së Lipjanit, ka ndërruar jetë më 23 mars 2026.
Kryetari aktual Imri Ahmeti, në emër të institucioneve komunale, ka ngushëlluar familjen Jashari për ndarjen nga jeta të tij. Në njoftimin zyrtar, Ahmeti shprehet se me pikëllim të thellë ka marrë lajmin për vdekjen e Ismajl Jasharit, i cili gjatë ushtrimit të detyrës si kryetar i Komunës së Lipjanit, në periudhën para luftës, ka dhënë kontribut të rëndësishëm në udhëheqjen dhe zhvillimin e komunës.
“Puna dhe përkushtimi i tij në drejtimin e komunës do të mbeten pjesë e rëndësishme e kujtesës institucionale, duke reflektuar rolin e tij në përfaqësimin e interesave të qytetarëve, forcimin e administratës komunale dhe ndërtimin e bazave për zhvillim institucional dhe shoqëror”, thuhet në njoftim.
“Kontributi i tij si ish-kryetar do të vlerësohet gjithmonë si pjesë e rrugëtimit dhe ndërtimit të institucioneve tona lokale”, shton Ahmeti. Ai shpreh ngushëllimet më të sinqerta për familjen Jashari, të afërmit, miqtë, bashkëpunëtorët dhe të gjithë ata që e kanë njohur e punuar me të. “Zoti e mëshiroftë!”