Robert Mueller, ish-drejtori i Byrosë Federale të Hetimit (FBI) dhe prokurori special që udhëhoqi hetimin për ndërhyrjen ruse në zgjedhjet presidenciale amerikane të vitit 2016, ka ndërruar jetë në moshën 81-vjeçare më 21 mars 2026, në mbrëmjen e së premtes.
Familja e tij konfirmoi lajmin përmes një deklarate të shpërndarë në media: “Me pikëllim të thellë ndajmë lajmin se Bob ndërroi jetë mbrëmë. Familja kërkon që privatësia e saj të respektohet”. Shkaku i vdekjes nuk është bërë i ditur.
Karriera në FBI
Mueller u emërua drejtor i FBI-së në gusht 2001 nga presidenti George W. Bush, vetëm një javë para sulmeve terroriste të 11 shtatorit. Ai udhëhoqi transformimin e agjencisë, duke zhvendosur fokusin nga krimi i brendshëm te parandalimi i terrorizmit. Shërbeu për 12 vjet deri në 2013, i konfirmuar fillimisht nga Senati me votim unanim (98 pro, 0 kundër) dhe i mbajtur në detyrë nga presidenti Barack Obama përtej mandatit tradicional.
Lindur në 1944, Mueller studioi në Universitetin e Princeton, shërbeu në Marinë në Vietnam, ku u plagos dy herë dhe mori Yllin e Bronztë për trimëri, pastaj u diplomua për drejtësi në Universitetin e Virxhinias në 1973.
Hetimi për ndërhyrjen ruse
Në 2017, zëvendësprokurori i përgjithshëm Rod Rosenstein e emëroi Mueller si prokuror special për të hetuar ndërhyrjen ruse në zgjedhjet 2016 dhe lidhjet e mundshme me fushatën e Donald Trump. Hetimi zgjati pothuajse dy vjet dhe prodhoi një raport të detajuar në 2019, që evidentoi kontakte të shumta mes fushatës Trump dhe Rusisë, si dhe ndërhyrje sistematike ruse për të mbështetur Trump dhe dëmtuar Hillary Clinton. Raporti nuk arriti në konkluzion për komplot kriminal ose pengesë drejtësie nga presidenti, por çoi në ngritjen e akuzave ndaj bashkëpunëtorëve të Trump.
Mueller njihej për profilin e ulët publik dhe reputacionin për integritet.
Reagimi i Trump
Pas lajmit, Donald Trump shkroi në Truth Social: “Robert Mueller sapo vdiq. Shkëlqyeshëm, jam i lumtur që vdiq. Ai nuk mund të lëndojë më njerëz të pafajshëm!”.
Përditësime
- Familja e Robert Mueller njoftoi në gushtin e kaluar se ai ishte diagnostikuar me Parkinson në 2021.
- Në dëshminë para Kongresit në korrik 2019, Mueller u shfaq i kujdesshëm si prokuror, duke shmangur pyetjet provokuese dhe duke theksuar se raporti nuk e çlironte Donald Trump.
CBS News ka konfirmuar vdekjen e Robert Mueller-it, ish-drektor i FBI-së dhe prokuror special.
Familja e tij deklaroi për Associated Press (AP): “Me trishtim të thellë, njoftojmë se Bob ndërroi jetë të premten në mbrëmje”.