Një incident ka ndodhur mbrëmjen e së mërkurës në Golem të Kavajës, ku policia ka konstatuar shtetasin A. B., 38 vjeç, duke lëvizur në rrugë, ndonëse i nënshtruar masës së sigurisë arrest në shtëpi për veprën penale shkatërrimi i pronës me zjarr.
Rreth orës 19:10, patrulla e Përgjithshme e Postës së Policisë Golem, së bashku me ndihmësspecialistin e zonës, e ka ndaluar për verifikim, pasi ishte i shoqëruar nga persona të tjerë.
Gjatë kontrollit, efektivët i kanë kërkuar shpjegime për thyerjen e masës dhe e kanë njoftuar se do të shoqërohej në Komisariatin e Policisë Kavajë për veprime të mëtejshme.
Në këtë moment, A. B. dhe kunati i tij, A. Sh., 23 vjeç, të ndihmuar nga familjarë të tjerë, kanë kundërshtuar me forcë shërbimet policore.
Për të zbrapsur situatën, ndihmësspecialisti i Postës së Policisë Golem ka qëlluar një herë në ajër me pistoletën e shërbimit.
Shërbime të tjera policore kanë mbërritur në ndihmë dhe kanë shoqëruar A. B., kunatin e tij si dhe familjarët e përfshirë.
Veprimet hetimore po kryhen nga oficeri i policisë gjyqësore pranë Prokurorisë së Juridiksionit të Përgjithshëm Durrës.
Për rastin është njoftuar edhe Agjencia e Mbikëqyrjes Policore.