Fisnik Asllani, sulmuesi i Kombëtares së Kosovës, po shkëlqen te Hoffenheim në Bundesligën gjermane. Në 21 ndeshje ai ka shënuar 7 gola dhe ka dhënë 6 asistime, duke kontribuar në sukseset e ekipit.
Ndihmëstrajneri Moritz Volz ka dhënë një intervistë për mediumin gjerman T-Online, ku ka lavdëruar Asllanin. "Fisniku është djalë i jashtëzakonshëm dhe me të vërtetë lojtar fantastik. Kënaqesh duke e parë jo vetëm në ndeshje, por edhe në stërvitje. Megjithatë, prioriteti i tij është që të kalojë formë sa më të mirë në Bundesligë dhe me përfaqësuesen. Më pas do të shohim. Fokusi jonë është që ta vazhdojmë punën me Fisin për potencialin që e ka. Deri tani ka shfaqur potencial të madh për moshën që e ka. Por, ka ende shumë hapësirë për zhvillim dhe për përmirësim", ka deklaruar Volz.
Sipas mediumeve gjermane, për 23-vjeçarin Asllani kanë shprehur interes Bayern Munich dhe Borussia Dortmund. Hoffenheim-i luan të dielën si mysafir ndaj Bayern Munich-ut nga ora 17:30.
Në tabelën e Bundesligës pas 20 ndeshjesh, Hoffenheim është në vendin e tretë me 42 pikë, ndërsa lider është Bayern Munich me 51 pikë. Hoffenheim-i është i vetmi ekip që ka fituar të gjitha ndeshjet në muajin janar.
Te Hoffenheim luajnë edhe kosovarët Albian Hajdari në mbrojtje dhe Leon Avdullahu në mesfushë.