Ministria e Bujqësisë dhe Zhvillimit Rural ka përllogaritur se Shqipërisë i duhen 1.9 miliardë euro ushqime këtë vit, bazuar në pritshmëritë për 14 milionë turistë. Kjo vlerë është 300 milionë euro më e lartë se viti i shkuar, kur vendin e vizituan rreth 12.5 milionë të huaj.
Turistët kërkojnë kryesisht prodhime shqiptare, por bujqësia vendase nuk arrin të plotësojë kërkesën. Theodhor Kristuli, kryetar i Unionit Agroushqimor, deklaroi se "kapacitetet janë, por nuk janë mundësitë", duke theksuar mungesën e konkurrueshmërisë. Ai vuri në dukje se në të gjitha shtetet bujqësia subvencionohet më shumë se në Shqipëri.
Turizmi vlerësohet si shans për bujqësinë, por financimi i dobët parashikon zgjerim të importeve. Kristuli u shpreh se "duke parë edhe pjesën e turizmit që po rritet ndjeshëm, do të ishte një gjë e mirë [...] të kthehej pak më shumë vëmendja te bujqësia. Do të ndihmonte ekonominë, fermerët, pra të gjithë ne".
Ministria e Bujqësisë dhe Zhvillimit Rural ka hequr kultivimin e grurit nga skema mbështetëse. Rritja e kërkesës nga turistët dhe prodhimi i dobët vendas kanë ushtruar presion mbi çmimet. Bulmeti dhe zarzavatet e prodhuara në vend u shtrenjtuan mesatarisht me rreth 5 për qind vitin e shkuar.