Në përvjetorin e katërt të pushtimit të Ukrainës nga Rusia, më 24 shkurt 2026, liderët perëndimorë kanë reaguar me deklarata mbështetëse për Kievin.
Presidenti francez Emmanuel Macron u shpreh skeptik gjatë një telekonference me udhëheqësit e aleatëve të Ukrainës. Ai vlerësoi si të dobishme iniciativat për zgjidhje paqësore, por theksoi mungesën e vullnetit nga pala ruse.
Deklaratat ruse dhe ukrainase
Zëdhënësi i Kremlinit Dmitry Peskov deklaroi se shumë nga qëllimet e Moskës janë zbatuar, me fokus kryesor sigurinë e banorëve në Ukrainën lindore.
Ndërsa Presidenti ukrainas Volodymyr Zelensky në një mesazh video tha se Vladimir Putin nuk i arriti qëllimet e tij, nuk fitoi luftën dhe Ukraina mbetet e pathyer. Ai premtoi përpjekje për një paqe të fortë, dinjitoze dhe të qëndrueshme.
Vizita e Von der Leyen
Presidentja e Komisionit Evropian Ursula von der Leyen vizitoi Ukrainën për të shprehur solidaritetin e Bashkimit Evropian. Në një postim në platformën X, ajo dërgoi mesazh të qartë popullit ukrainas dhe agresorit: Evropa nuk do të tërhiqet derisa të rivendoset paqja.
Ajo përmendi rritjen e mbështetjes ushtarake, me theks në sistemet e mbrojtjes ajrore, dronët dhe municionet me rreze të gjata. Gjithashtu, u fol për garanci të forta sigurie dhe prosperiteti.
Von der Leyen pritet të marrë pjesë në një takim trepalësh me Zelensky dhe Presidentin e Këshillit Evropian Antonio Costa.