Volodymyr Zelensky deklaroi se Emmanuel Macron po kërkon një "dialog alternativ me Rusinë" për të dhënë fund luftës në Ukrainë.
Duke folur para gazetarëve, Zelensky shpjegoi se kjo nismë lind në një kohë kur Kievi dhe Moska zhvillojnë bisedime trepalëshe me ndërmjetësimin e Shteteve të Bashkuara. Ai theksoi se Franca "duhet të jetë pjesë e procesit të përfundimit të luftës dhe të ketë zërin e saj".
Zelensky njoftoi se infrastruktura energjetike e Ukrainës ka pësuar dëme të konsiderueshme nga sulmet ruse. Ai vlerësoi se Rusia nuk ka treguar gatishmëri për të dhënë fund luftës, duke vazhduar politikën e shkatërrimit në front dhe me sulme masive.
Ai u informua nga negociatorët ukrainas për takimet e fundit me SHBA-në dhe Rusinë në Abu Dhabi. Zelensky nënvizoi nevojën për përparim në bisedime, duke përfshirë garanci efektive të sigurisë dhe angazhimin e aleatëve.
Më herët, Zelensky ka thënë se SHBA-ja propozon përfundimin e luftës para verës 2026 dhe mund të ushtrojë presion mbi palët në përputhje me këtë afat, në lidhje me zgjedhjet e mesmandatit në nëntor 2026.