Shërbimet e Policisë Kufitare Morinë, në bashkëpunim me DVP Kukës, arrestuan më 24 shkurt 2026 një shtetas turk në hyrje të Shqipërisë.
31-vjeçari V. B., banues në Stamboll, u kap gjatë kontrolleve me përzgjedhje dhe verifikimeve në pikën kufitare Morinë. Ai ishte shpallur në kërkim ndërkombëtar nga autoritetet austriake për veprën penale "prodhim dhe shitje të lëndëve narkotike".
Nga informacioni i shkëmbyer me Interpol Tiranën, rezultoi se Gjykata e Vjenës kishte vendosur ndaj tij masën e sigurisë "arrest në burg". Arrestimi u bë me qëllim ekstradimin dhe për të parandaluar lëvizjen e paligjshme të personave në kërkim.
Interpol Tirana, në bashkëpunim me homologët austriakë, vijon procedurat për dërgimin e tij në Austri. Këto kontrolle synojnë goditjen e paligjshmërive në kufi.