Kryeministri i Izraelit, Benjamin Netanyahu, ka përsëritur zotimin se Irani nuk do të zotërojë kurrë armë bërthamore për sa kohë që ai do të qëndrojë në krye të qeverisë izraelite. Në një mesazh të shpërndarë në rrjetin social X, ai theksoi se bashkërendimi me Shtetet e Bashkuara të Amerikës mbetet element kyç i kësaj politike.
Sipas Netanyahu-t, ekziston një dakordësi e plotë me presidentin amerikan Donald Trump për të frenuar zhvillimin e kapaciteteve bërthamore të Teheranit. Kryeministri izraelit argumentoi se përpjekjet e tij diplomatike gjatë tre dekadave të fundit kanë qenë thelbësore për të penguar Iranin nga zhvillimi i bombave atomike, të cilat ai i cilëson si kërcënim për shkatërrimin e Izraelit.
"Po të mos ishte për këtë luftë, Irani do të kishte zotëruar shumë kohë më parë bomba atomike për të shkatërruar Izraelin. Irani po punon për të shkatërruar shtetin hebre dhe unë po ia kushtoj jetën time parandalimit të tyre që ta bëjnë këtë", deklaroi ai.
Këto komente vijnë në një periudhë kur qarkullojnë raportime se SHBA-të dhe Irani mund të jenë më afër arritjes së një marrëveshjeje paraprake për të provuar t'i japin fund luftimeve.