Benjamin Netanyahu, kryeministri izraelit, pak para se të hipte në avion për në Uashington, ku do të takohet me Donald Trump, u shpreh se synon t’i përcjellë presidentit amerikan qëndrimin e Izraelit mbi bisedimet bërthamore të SHBA-së me Teheranin.
Ai theksoi se do t’i paraqesë presidentit qasjen e Izraelit në lidhje me parimet në negociata. Këto parime, sipas tij, nuk prekin vetëm Izraelin, por çdo vend në botë që kërkon paqe dhe siguri.
Në takimin midis dy udhëheqësve do të diskutohen një numër çështjesh, përfshirë situatën në Gaza.
Netanyahu vuri në dukje se takimet e përsëritura me Trump dëshmojnë për afërsinë unike midis Izraelit dhe Shteteve të Bashkuara, si dhe për marrëdhënien e tyre personale.