Apeli i udhëheqëses së partisë Rassemblement National (RN), Marine Le Pen, fillon sot në Gjykatën e Apelit të Parisit. Ky proces gjyqësor, që nis në orën 13:30 dhe zgjat teorikisht deri më 11 ose 12 shkurt, përfshin gjithashtu partinë e saj dhe 11 të pandehur të tjerë. Nga përfundimi i këtij apeli varet e ardhmja politike e Le Pen-it, veçanërisht mundësia për të garuar në zgjedhjet presidenciale të vitit 2027.
Në mars të vitit të kaluar, Marine Le Pen, 57 vjeçe, u dënua në shkallë të parë me katër vjet burg, nga të cilat dy pa pezullim dhe të vuajtshme me byzylyk elektronik, si dhe me një gjobë prej 100 mijë euro. Më kryesorja, asaj iu ndalua e drejta e kandidimit për poste publike për pesë vjet, me efekt të menjëhershëm. Ky sanksion e pengon atë të marrë pjesë në zgjedhje për presidencën apo funksione të tjera të zgjedhura.
Akuzat lidhen me një sistem përvetësimi fondesh publike nga viti 2004 deri në 2016. Sipas prokurorisë dhe Parlamentit Europian, i cili shërben si palë civile, Le Pen dhe bashkëpunëtorët e saj kishin punësuar asistentë fiktivë për Parlamentin Europian në Bruksel dhe Strasburg, të cilët në realitet punonin për partinë Front National (sot RN). Gjykata vlerësoi dëmin në rreth 3,2 milionë euro, pas kthimit të 1,1 milionë eurove nga disa të pandehur. Mbi 20 figura të tjera të partisë u shpallën fajtore, ndërsa partia u gjobit me 2 milionë euro, gjysma e pezulluar.
Le Pen mohon çdo parregullsi dhe e ka quajtur procesin "tirani të gjyqtarëve", duke thënë se synon të udhëheqë Francën. Nëse apeli dështon, ajo mund të përballet me dënim më të rëndë dhe zëvendësim nga presidenti i partisë, Jordan Bardella, 30 vjeç. Bardella ka deklaruar se ndalimi i Le Pen-it do të ishte shqetësues për demokracinë dhe se ai synon postin e kryeministrit, jo presidencën.
Sondazhet tregojnë se Bardella ka shanse më të larta: sipas një ankete të Verian për Le Monde, 49 për qind e francezëve e shohin atë si favorit, krahasuar me 18 për qind për Le Pen-in. Një sondazh tjetër i Odoxa-s sugjeron se Bardella do ta fitonte presidencën kundër çdo kundërshtari në raundin e dytë. Analistët theksojnë se gara e 2027-s mbetet e pasigurt, me kandidatë të tjerë ende të papërcaktuar.
Përditësime
Gjykata e apelit e cilësoi Marine Le Pen si 'zemër të sistemit' të përvetësimit të fondeve publike, sipas gjykatëses Bénédicte de Perthuis. Vlerësimi i dëmit u rishikua në 2.9 milionë euro, krahasuar me 3.2 milionë euro më parë.
Marine Le Pen shprehu shpresën se do t'i bindë gjyqtarët për pafajësinë e saj. “Shpresoj se do të jem në gjendje t’i bind gjyqtarët për pafajësinë time”, deklaroi ajo jashtë gjykatës në Paris. Ajo shtoi: “Është një gjykatë e re me gjyqtarë të rinj. Çështja do të rifillojë, si të thuash.”
Le Pen e denoncoi çështjen si “një skandal demokratik”.
Apeli kundërshton dënimin e saj prej dy vjet me kusht për keqpërdorim fondesh publike evropiane.
Mbrojtja e saj shpreson për heqjen e klauzolës së zbatimit të menjëhershëm të ndalimit për të kandiduar në zgjedhje.