Procesi i votimit ka nisur sot, më 7 qershor 2026, në të gjitha qendrat e votimit në qytetet e Kosovës, përfshirë Mitrovicën e Jugut, Mitrovicën e Veriut dhe komunat e tjera veriore të vendit. Në të gjitha qendrat është raportuar një fillim normal i procesit zgjedhor.
Në Mitrovicën e Jugut, procesi zhvillohet në 32 vendvotime dhe një vendvotim me kusht, për rreth 80 mijë qytetarë me të drejtë vote. Ndërkaq, në Mitrovicën e Veriut, votuesit e kanë të mundshme të ushtrojnë të drejtën e tyre në gjashtë qendra të votimit dhe një vendvotim me kusht, ku numri i qytetarëve me të drejtë vote është 18 mijë e 781.
Sipas informacioneve nga Komisionet Komunale të Zgjedhjeve, shpërndarja e materialeve zgjedhore është përmbyllur me kohë në të gjitha qendrat dhe vëzhguesit janë sistemuar sipas planifikimit. Raportohet se qytetarët serbë në veri po marrin pjesë në votim në mënyrë të organizuar, ashtu siç ka ndodhur edhe në proceset e kaluara zgjedhore.