Në Dhomat e Specializuara të Kosovës në Hagë ka nisur sot procesi i shpalosjes së deklaratave përmbyllëse në gjyqin kundër ish-presidentit Hashim Thaçi, si dhe Bashkim Smakajt, Isni Kilajt, Fadil Fazliut dhe Hajredin Kuçit, të cilët akuzohen për pengim të drejtësisë. Ndërsa Thaçi është i pranishëm në sallën e gjyqit, të akuzuarit e tjerë po e ndjekin seancën përmes video-lidhjes. Palëve u janë caktuar tri ditë kohë për të paraqitur argumentet e tyre përmbyllëse.
Prokurorja e specializuar, Kimberly West, gjatë fjalës së saj pretendoi se Thaçi dhe të bashkëakuzuarit kanë ndikuar për muaj me radhë tek dëshmitarët e thirrur në procesin për krime lufte dhe krime kundër njerëzimit. Sipas Prokurores, ekzistojnë orë të tëra incizimesh dhe dokumente që provojnë përpjekjet për ndryshimin e dëshmive dhe përshtatjen e tyre me narrativin e ish-presidentit, duke përfshirë diskutime mbi hierarkinë e UÇK-së dhe zbehjen e rolit komandues të tij. West deklaroi se udhëzimet për dëshmitarët diskutoheshin madje edhe gjatë vizitave në qendrën e paraburgimit.
Thaçi përballet me tri akuza për tentim për pengim të personave zyrtarë dhe tetë akuza për shkelje të fshehtësisë së procedurës. Smakaj, Kilaj dhe Fazliu akuzohen për pengim të personave zyrtarë dhe mosbindje ndaj gjykatës, ndërsa Kuçi përballet me dy akuza për mosbindje ndaj gjykatës. Që të pestë të akuzuarit janë vetëdeklaruar të pafajshëm që nga fillimi i gjykimit më 27 shkurt.
Dy ditë pas përfundimit të këtyre deklaratave, Thaçi, së bashku me Kadri Veselin, Jakup Krasniqin dhe Rexhep Selimin, do të dalin para trupit gjykues për t'u përballur me aktgjykimin lidhur me akuzat për krime lufte gjatë viteve 1998-1999. Në rast se Thaçi shpallet i pafajshëm për krime lufte, çështja e qëndrimit në paraburgim do të vendoset nga gjyqtari i vetëm që po shqyrton rastin për pengim të drejtësisë, sipas rregullores së Gjykatës Speciale.
Përditësime
Ish-presidenti Hashim Thaçi ndodhet fizikisht në sallën e gjyqit, ndërsa të bashkëakuzuarit e tjerë po marrin pjesë përmes video-lidhjes. Prokuroria paraqiti prova konkrete, duke përfshirë incizime dhe dokumente, që dëshmojnë përpjekjet për ndikim te dëshmitarët. Trupi gjykues u dha palëve tri ditë afat për paraqitjen e argumenteve përmbyllëse.
Prokurorja Kimberly West zbuloi detaje mbi përpjekjet e Hashim Thaçit për të ndikuar te dëshmitarët gjatë procesit gjyqësor. Prokuroria pretendon se Thaçi ka udhëzuar dëshmitarët të përgjigjen shkurt, me 'po' ose 'jo', për të kufizuar dëshmitë e tyre. Dokumentet e paraqitura përmendin ndikim të dyshuar ndaj Rrustem Mustafës, Sulejman Selimit dhe Bislim Zyrapit. Sipas prokurorisë, këto udhëzime kishin për qëllim ndryshimin e narrativit mbi hierarkinë e UÇK-së dhe rolin komandues të Thaçit.