Në fshatin Kalludër e Vogël të komunës së Zubin Potokut kanë filluar gërmimet në një lokacion ku dyshohet se ndodhet një varrezë masive e personave të zhdukur gjatë luftës në Kosovë. Në këtë operacion janë angazhuar njësitet elitare të Policisë së Kosovës dhe ekspertë nga Instituti i Mjekësisë Ligjore, ndërsa gjashtë patrulla të EULEX-it po monitorojnë dhe ofrojnë mbështetje sigurie në terren.
Zhvillimet e fundit vijnë pas njoftimit nga Policia e Kosovës dhe Prokuroria Speciale lidhur me arrestimin e dy personave të dyshuar për krime lufte. Sipas autoriteteve, këto arrestime janë të ndërlidhura me hetimet për lokacionin ku po kryhen gërmimet. Ekipi i antropologëve, i cili ka hyrë në zonën e izoluar, ka gjetur mbetje mortore dhe veshmbathje, të cilat po i nënshtrohen ekzaminimeve forenzike.
Ky lokacion lidhet me fatin e 23 shqiptarëve, të njohur si “Grupi i Intelektualëve”, të cilët u rrëmbyen me forcë më 19 prill 1999 në zonën e Drethit dhe Kalludrës. Shumica e këtyre personave ishin nga rajoni i Mitrovicës. Pas më shumë se 27 vitesh nga zhdukja e tyre, familjarët vazhdojnë të kërkojnë të vërtetën dhe drejtësinë.
Institucionet e Kosovës kanë bërë të ditur vazhdimisht se dokumentet zyrtare tregojnë për përfshirjen e Ushtrisë Jugosllave në këto krime lufte. Qeveria dhe institucionet përkatëse kanë apeluar për bashkëpunim dhe hapjen e arkivave, me qëllim zbardhjen e plotë të fatit të të gjithë personave të zhdukur gjatë luftës.
Përditësime
Prokuroria Speciale e Kosovës ka identifikuar dy të dyshuarit për krime lufte në zonën e Kalludrës si Momir Jakshiq dhe Milojko Bishevac. Zëdhënësja e këtij institucioni, Arbnora Luta, konfirmoi se, në bazë të autorizimit nga Gjykata Themelore në Prishtinë, është lëshuar urdhri për ekshumimin dhe autopsinë e mbetjeve mortore të gjetura në lokacionin e dyshuar si varrezë masive.
Policia e Kosovës ka ndaluar dy të dyshuar, M.J. dhe M.B., nën dyshimin për krime lufte të kryera në prill të vitit 1999.
Autoritetet kanë zgjeruar operacionin për kërkimin e personave të zhdukur, duke identifikuar një lokacion të dytë të dyshuar si varrezë masive në Jabukë të Zubin Potokut. Ekipet e Institutit të Mjekësisë Ligjore (IML), Policisë së Kosovës dhe EULEX-it kanë siguruar perimetrin e zonës. Prokuroria e Shtetit ka kërkuar zyrtarisht nga Gjykata Themelore autorizimin për gërmime, krahas operacionit që po zhvillohet paralelisht në Kalludër të Vogël.
Gërmimet në Kalludër të Vogël kanë hyrë në ditën e nëntë. Policia e Kosovës ka njoftuar arrestimin e 3 personave të dyshuar, duke rritur numrin nga 2 që ishte raportuar më parë. Ndërkohë, në lokacionin e Jabukës, operacioni ka përfunduar pas 24 orësh, ku u gjetën 4 mbetje mortore dhe një batanije. Hetuesit kanë identifikuar një lokacion të tretë midis Kalludrës së Vogël dhe Jabukës, ku pritet të nisin gërmimet së shpejti.