Ministria e Punëve të Brendshme në Maqedoninë e Veriut ka njoftuar se ka nisur hetim për një prift që zhvilloi një ceremoni fetare në automjete zyrtare policie. Ceremonia u krye në oborrin e ministrisë në Shkup, ku prifti shenjtëroi makinat në prani të oficerëve policorë.
Fotografitë e ngjarjes, të publikuara në rrjetet sociale ditët e fundit, kanë shkaktuar reagime të shumta në opinionin publik. Sipas mediave vendase, ato tregojnë priftin duke kryer ritin fetar mbi automjetet zyrtare.
Ministria e Punëve të Brendshme deklaroi se Departamenti për Kontroll të Brendshëm, Hetime Penale dhe Standarde Profesionale po ndërmerr masa për të përcaktuar rrethanat. Publiku do të njoftohet pas përfundimit të hetimit, sipas deklaratës zyrtare.
Një pjesë e qytetarëve e justifikon veprimin si pjesë e traditës ortodokse, ku ekziston një lutje për shenjtërimin e automjeteve, duke e parë si akt simbolik për mbrojtje dhe siguri. Ndërkaq, një pjesë tjetër e publikut reagon ashpër, duke argumentuar se praktika bie ndesh me parimin kushtetues të sekularizmit dhe se institucionet shtetërore duhet të ruajnë neutralitet fetar.
Debati ka ringjallur diskutime mbi kufirin mes zakoneve fetare dhe funksionimit të institucioneve laike, si dhe nevojën për rregulla të qarta në hapësirën publike. Reagime të ngjashme u regjistruan një vit më parë, kur në ambientet e Kuvendit u zhvillua një ceremoni fetare.