Prej të mërkurës, një grup delegatësh të Kuvendit të Lidhjes Demokratike të Kosovës (LDK) ka nisur mbledhjen e nënshkrimeve për thirrjen e një mbledhjeje të jashtëzakonshme, në të cilën synohet të shqyrtohet kërkesa për shkarkimin e kryetarit Lumir Abdixhiku.
Sipas rregullave të brendshme, për thirrjen e kësaj mbledhjeje nevojiten nënshkrimet e një të tretës së delegatëve. Sipas informacioneve, deri më tani nuk janë siguruar 118 nënshkrimet e nevojshme nga gjithsej 355 delegatë.
Nisma pason pakënaqësitë e shprehura pas zgjedhjeve të 7 qershorit. Javën e kaluar, dega e LDK-së në Pejë, ajo në Lipjan dhe Dega e II në Prishtinë kërkuan dorëheqjen e Abdixhikut, duke e arsyetuar kërkesën me rezultatin e dobët zgjedhor. Kësaj thirrjeje i është bashkuar edhe deputetja Hykmete Bajrami.
Nga ana tjetër, kryetari Lumir Abdixhiku ka kërkuar dorëheqjen e kryetarit të Degës së LDK-së në Pejë, Gazmend Muhaxheri, dhe të kryetarit të Degës në Lipjan, Imri Ahmeti, për shkak të rezultatit të dobët në këto degë. Po ashtu, Abdixhiku deklaroi se Kuvendi i partisë do të mblidhet në vitin 2027, në mbledhjen e rregullt.
Kujtojmë se pas zgjedhjeve të 28 dhjetorit, Abdixhiku kishte ofruar dorëheqjen nga posti i kryetarit, por më 31 janar Kuvendi i LDK-së e refuzoi atë kërkesë.
Përditësime
Kanë nisur procedurat për thirrjen e një Kuvendi të Jashtëzakonshëm në Lidhjen Demokratike të Kosovës (LDK), me qëllim shkarkimin e kryetarit Lumir Abdixhiku. Nismëtarët kanë siguruar deri më tani 150 nënshkrime nga 118 që nevojiten për kuorum, ndërsa synojnë të arrijnë pragun e 200 nënshkrimeve. Organizatorët kanë paralajmëruar mbajtjen e Kuvendit brenda javës së ardhshme, ndërsa zyrtarët besnikë ndaj Abdixhikut po tentojnë të pengojnë procesin e mbledhjes së nënshkrimeve.