Përkeqësimi i kushteve atmosferike ka sjellë pasoja tragjike në fshatin Pozheran të Komunës së Vitisë. Rreth orës 16:30 të datës 21 korrik 2026, një burrë i lindur në vitin 1965 ka humbur jetën pasi dyshohet se është rrëshqitur aksidentalisht në dyshemenë e ballkonit të shtëpisë së tij, duke marrë lëndime në kokë.
Zëdhënësi i Policisë së Kosovës për rajonin e Gjilanit, Valon Osmani, ka konfirmuar se viktima u dërgua me autoambulancë në Qendrën Emergjente të Spitalit të Përgjithshëm në Gjilan, mirëpo mjeku kujdestar ka konstatuar se ai kishte mbërritur pa shenja jete. Policia, në koordinim me Prokurorin e Shtetit, ka nisur veprimet hetimore për zbardhjen e rrethanave të rastit, ndërsa trupi i pajetë është dërguar për obduksion në Institutin e Mjekësisë Ligjore në Prishtinë.
Në të njëjtën zonë, stuhia ka shkaktuar lëndime të lehta për dy persona të tjerë, të cilët u goditën nga dyert hyrëse të oborrit të tyre, të rrëzuara nga erërat e forta. Të dy qytetarët morën ndihmën e nevojshme mjekësore në spitalin e Gjilanit dhe më pas janë liruar për në shtëpi.
Drejtoria Rajonale e Policisë në Gjilan u ka bërë apel qytetarëve që të tregojnë kujdes të shtuar gjatë përkeqësimit të motit, të shmangin lëvizjet e panevojshme në zonat e rrezikuara dhe të zbatojnë udhëzimet e institucioneve përkatëse.