Ministrja e Arsimit, Mirela Kumbaro, vizitoi Universitetin e Sporteve dhe bëri me dije zgjidhjen e ngërçit ligjor për Fakultetin e Shkencave të Rehabilitimit. Studentët e diplomuar në programin Shkenca Rehabilitimi mund të ushtrojnë tani profesionin e fizioterapistit.
Sipas vendimit të Këshillit të Ministrave, të miratuar më 6 mars, ndryshimet në VKM për profesionet e rregulluara përfshijnë qartësisht këto diploma si kualifikim zyrtar. Të diplomuarit mund të regjistrohen në Urdhrin e Infermierëve të Shqipërisë dhe të punojnë ligjërisht në profesion.
Kumbaro shpjegoi se çështja u diskutua gjatë me rektorin, dekanin, Urdhrin e Infermierëve të Shqipërisë dhe Ministrinë e Shëndetësisë. Pas rishikimit të ligjit dhe shkëmbimit të shkresave, qeveria miratoi ndryshimin e nevojshëm. «Vij sot me shumë kënaqësi, sepse në mbledhjen e javës së kaluar, qeveria miratoi ndryshimet e nevojshme në VKM», tha ajo.
Ky vendim jep mundësi brezave të mëparshëm të diplomuarve dhe atyre në proces diplomimi. Kumbaro nënvizoi se ai do të ketë impakt pozitiv në regjistrimet e reja, që janë në vazhdim, duke garantuar integrimin në tregun e punës si kolegët nga institucionet e tjera të arsimit të lartë të shëndetësisë.