Në Liqenin e Ujmanit u shënua festa ortodokse e Bogojavljenjes përmes manifestimit tradicional të notimit për kryqin. Mbi 300 qytetarë serbë u hodhën në ujërat e ftohta të liqenit, pavarësisht temperaturave të ulëta, për të tentuar kapjen e kryqit, duke regjistruar një numër rekord pjesëmarrjesh.
Manifestimi tërhoqi një numër të madh pjesëmarrësish dhe shikuesish. Gjatë tij u vërejtën flamuj me simbole shtetërore të Federatës Ruse, si dhe bluza me fytyrat e terroristëve të Banjskës.
Kisha Ortodokse Serbe ka bërë të ditur se, për arsye sigurie dhe për shkak të kushteve të motit, nuk ka marrë përsipër përgjegjësinë për organizim, ndonëse ngjarja u mbajt sipas traditës së viteve të kaluara.
Zyrtarë të Policisë së Kosovës ishin të pranishëm, monitoruan situatën dhe u angazhuan për mbarëvajtjen e rendit dhe sigurisë publike gjatë gjithë aktivitetit.
Notimi për kryqin në Liqenin e Ujmanit organizohet tradicionalisht që nga viti 2011. Ai zhvillohet në një distancë simbolike prej 33 metrash nga bregu, që përfaqëson vitet e jetës së Jezu Krishtit. Pjesëmarrësi i parë që arrin te kryqi e merr atë si shpërblim, simbol i besimit dhe festës.