Numri i ushtarëve amerikanë të vrarë në sulmin ndaj trupave në Kuvajt të dielën është rritur në 6, njoftoi Komanda Qendrore e SHBA-së të hënën pasdite. Sulmi, që rezultoi në vdekjen e anëtarëve të parë të shërbimit amerikan në luftën midis SHBA-së dhe Iranit, ishte një goditje e drejtpërdrejtë në një qendër operacionesh të improvizuara në portin civil Shuaiba të dielën në mëngjes sipas kohës lokale.
Shuaiba është një port i rëndësishëm në Kuvajtin jugor. Më herët, presidenti amerikan Donald Trump tha se vala më e madhe e sulmeve mbi Iranin nuk kishte ndodhur ende, duke paralajmëruar përshkallëzim të konfliktit. Ai u shpreh se SHBA janë të përgatitura ushtarakisht për t’u përballur me këtë luftë edhe për më shumë se 4 apo 5 javë, që ishte afati i dhënë më parë prej tij.
Lufta në Lindjen e Mesme u zgjerua të hënën, me Iranin që ndërmori një sërë sulmesh hakmarrëse ndaj vendeve të rajonit, ndërsa Shtetet e Bashkuara dhe Izraeli vazhduan të bombardonin Teheranin. Sipas Kryqit të Kuq iranian, deri tani janë shënuar të paktën 555 viktima nga sulmet izraelite dhe amerikane në vend.
Izraeli nisi sulme të reja në Teheran pasditen e së hënës dhe tha se ka në shënjestër regjimin e Iranit. Mediat iraniane raportuan se si pasojë e sulmit izraelito-amerikan mbi rezidencën e Khameneit në fundjavë, ka ndërruar jetë bashkëshortja e liderit suprem, e cila kishte qenë në koma për orët e fundit si pasojë e plagëve të marra.
Teherani bëri të qartë se nuk do të ulet në tryezën e bisedimeve, pavarësisht që zyrtarët amerikanë thanë se liderët iranianë kishin kërkuar të flisnin me palën amerikane.