Nxënës të gjimnazit “Sulejman Delvina” në Delvinë protestuan më 6 mars 2026 para Komisariatit të Policisë në të njëjtin qytet, pas një incidenti në shkollën e tyre.
Protesta erdhi pas përplasjes mes dy nxënësve, e cila nisi brenda mjediseve shkollore dhe u përshkallëzua jashtë tyre, duke përfunduar me goditje me thikë në shpatull të njërit prej tyre.
Sipas nxënësve protestues, sjellja problematike e një nxënësi ishte denoncuar disa herë te drejtoria, por nuk u morën masa konkrete për ta parandaluar përshkallëzimin. Prindërit nuk u njoftuan për incidentin, ndërsa nxënësi i përfshirë u lejua të largohej në orën e pestë, ndërkohë që mësimi zhvillohet me gjashtë orë.
Nxënësit e quajnë të përsëritur këtë situatë dhe akuzojnë drektorinë për krijimin e një klime pasigurie. Një burim thotë se nxënësi që plagosi bashkëmoshatarin jashtë shkollës është 15-vjeçar dhe protestuesit kërkojnë largimin e tij.
Ata kërkojnë hetim nga institucionet përkatëse dhe masa për garantimin e sigurisë, duke deklaruar se nuk do të kthehen në mësim pa këto masa.