Një ngjarje vandalizmi është regjistruar gjatë natës në Shkollën e Mesme të Bashkuar “Asllan Keta” në Bulqizë, ku klasa e katërt ka pësuar dëmtime të konsiderueshme. Ngjarja u konstatua mëngjesin e 11 majit 2026, kur stafi pedagogjik dhe nxënësit mbërritën për të nisur mësimin.
Bankat dhe karriget u gjetën të dëmtuara, materialet mësimore të shpërndara në dysheme, ndërsa muret dhe pajisjet e klasës kishin pësuar dëme. Drejtoria e shkollës njoftoi menjëherë Policinë, e cila mbërriti në vendngjarje për veprimet e para hetimore.
Nga këqyrja e kamerave të sigurisë, dyshohet se disa nxënës të institucionit hynë në shkollë nga pjesa e pasme, duke shmangur hyrjen kryesore. Pamjet filmike u sekuestruan dhe po analizohen për të zbardhur dinamikën e ngjarjes dhe përgjegjësit.
Policia ka shoqëruar disa nxënës dhe prindër të tyre për t’i marrë në pyetje. Hetuesit po verifikojnë motivet e aktit si dhe mundësinë e përfshirjes së personave të tjerë.
Ngjarja ka nxitur reagime në komunitet. Prindër, nxënës dhe banorë e kanë dënuar veprimin, duke e cilësuar të papranueshëm dhe duke kërkuar masa më të forta sigurie në institucionet arsimore. Drejtoria e shkollës pritet të ndërhyjë për rikthimin e normalitetit në ambientet e dëmtuara, ndërsa hetimet vazhdojnë.