M. H., mësuese 58-vjeçare, është shpallur në kërkim nga specialistët për Hetimin e Krimeve të Komisariatit të Policisë Nr. 5 në Kamzë. Ajo dyshohet se ka ushtruar dhunë fizike dhe psikologjike ndaj nxënësve gjatë procesit mësimor në një shkollë 9-vjeçare.
Hetimet bazohen në pamjet filmike të transmetuara në emisionin investigativ „STOP”, si dhe në veprimet e tjera hetimore. Policia njofton se po punohet për kapjen e saj dhe për dokumentimin e plotë ligjor të rastit. Materialet procedurale iu referuan Prokurorisë për veprime të mëtejshme.
Më parë, Ministria e Arsimit njoftoi shkarkimin e menjëhershëm të mësueses nga detyra. Ministrja Mirela Kumbaro deklaroi se pas publikimit të pamjeve të dhunës u ngrit një grup i posaçëm për verifikimin e rastit dhe u morën masat e duhura ligjore.
Sipas saj, përveç largimit nga puna të mësueses, ka nisur një hetim administrativ për të verifikuar përgjegjësitë në zinxhirin drejtues të shkollës.