Një mësues 58-vjeçar, i identifikuar si G. N., banues në fshatin Velhov, është proceduar penalisht për dyshimin e keqtrajtimit të një nxënësi në shkollën 9-vjeçare të fshatit Finiq. Ngjarja ndodhi gjatë orës së mësimit dhe u denoncua në rrjetet sociale më 19 mars.
Policia e Sarandës konfirmoi se shërbimet e Komisariatit referuan materialet në Prokurori. Në njoftimin zyrtar thuhet se G. N. dyshohet se ka ushtruar dhunë fizike ndaj nxënësit. Rasti u bë i njohur përmes një videoje që u përhap shpejt në rrjete.
Sipas dëshmive të shokëve të klasës, ngjarja ndodhi brenda ambientit të shkollës. Nxënësit përmendin se mësuesi i lëndës së Fizikës reagoi ashpër pasi nxënësi i kishte pëshpëritur një fjalë në vesh një shoku. Reagimi kaloi në dhunë fizike ndaj të miturit.
Prokuroria po drejton hetimet, duke mbledhur dëshmi, prova dhe pamje të siguruar nga ngjarja. Autoritetet po punojnë për zbardhjen e plotë të rrethanave.