Oda e Mjekëve të Kosovës ka mbajtur mbledhjen konstituive të Kuvendit të legjislaturës së katërt, ku u theksua rëndësia e forcimit të standardeve profesionale dhe e bashkëpunimit institucional për avancimin e sistemit shëndetësor.
Ministri i Shëndetësisë, Arben Vitia, deklaroi se roli i Odës së Mjekëve dhe i odave të tjera është i pazëvendësueshëm në forcimin e standardeve profesionale, në avancimin e etikës mjekësore dhe në mbështetjen e zhvillimit të vazhdueshëm profesional të mjekëve. Ai vlerësoi kontributin e dukshëm dhe të prekshëm të odës.
Vitia përmendi se, përmes programeve të edukimit të vazhdueshëm profesional, Oda e Mjekëve bashkë me institucionet ka investuar mbi një milion euro. Ky investim ka kontribuar drejtpërdrejt në ngritjen e kapaciteteve profesionale të mjekëve dhe në përmirësimin e cilësisë së shërbimeve shëndetësore. Ai e cilësoi këtë si investim në dije, profesionalizëm dhe cilësi të sistemit shëndetësor.
Ministri theksoi nevojën për bashkëpunim serioz dhe konstruktiv ndërmjet Ministrisë së Shëndetësisë dhe Odës së Mjekëve, i cili është reflektuar në shumë procese për sistemin shëndetësor dhe ka dhënë rezultate në dobi të pacientëve dhe profesionit mjekësor. Ai e cilësoi procesin zgjedhor brenda odës si moment të rëndësishëm institucional.