Organizatat joqeveritare të Gjakovës protestuan më 2 nëntor para stacionit policor, Gjykatës Themelore dhe prokurorisë, kundër vrasjes së grave dhe dhunës ndaj tyre. Protestuesit kërkuan përgjegjësi institucionale dhe angazhim më të madh të shoqërisë për parandalimin e dhunës.
Ideal Zhaveli, përfaqësues i OJQ-së Activism Root, tha se protesta synonte ngritjen e zërit dhe kërkimin e përgjegjësisë nga institucionet përkatëse. Ai theksoi se kishin kaluar tetë ditë nga vrasja e Arlinda Zekajt dhe se ende nuk ishin ndërmarrë masat e duhura ndaj përgjegjësve kryesorë.
Dorina Babuni-Krelani, përfaqësuese e OJQ-së Medika, tha se protesta, përveç kërkesës për përgjegjësi institucionale, ishte edhe thirrje për gjithë shoqërinë që të angazhohej më shumë në çdo mjedis shoqëror për parandalimin e dhunës ndaj grave.