Anëtarët e opozitës në Komisionin për Europën dhe Punët e Jashtme të Kuvendit kanë kërkuar paraqitjen urgjente të ministrit të Europës dhe Punëve të Jashtme, Ferit Hoxha, për të dhënë shpjegime lidhur me dy incidente diplomatike. Kërkesa zyrtare u dërgua kryetarit të komisionit, Igli Hasani, më 28 prill 2026.
Sipas deputetëve demokratë, incidenti i parë përfshin një komunikim të Ferit Hoxhas me trupën diplomatike shqiptare, ku ai ka udhëzuar që Donika Gervalla, ministre e Drejtësisë dhe ish-ministre e Punëve të Jashtme të Kosovës, të mos ketë asnjë komunikim apo vizitë me ministra të Republikës së Shqipërisë. Opozita e cilëson këtë si cenim të bashkëpunimit ndërshqiptar dhe dëmtim të marrëdhënieve Shqipëri-Kosovë.
Incidenti i dytë lidhet me një mesazh të pretenduar të Ferit Hoxhas në një grup komunikimi me ambasadorët shqiptarë, ku ai ka përdorur shprehjen "idiotë" për shqiptarët e Maqedonisë së Veriut. Deputetët demokratë e quajnë këtë fyerje të thellë nga kreu i diplomacisë shqiptare ndaj bashkëkombësve.
Ministri Ferit Hoxha ka reaguar më herët për mesazhin e dytë, duke deklaruar se "nuk ka asgjë të vërtetë në ato mesazhe" dhe i ka quajtur pretendimet "tymnajë". Ai theksoi se Shqipëria ecën drejt Bashkimit Evropian dhe nuk do të merret me interpretime të tilla. Opozita insiston se heshtja e ministrit e bën atë përgjegjës për pasojat diplomatike.