Deputeti i Partisë Demokratike, Belind Këlliçi, ka reaguar ashpër ndaj mohimit të bërë nga zyra e shtypit e Ministrisë për Evropën dhe Punët e Jashtme lidhur me një mesazh të atribuar ministrit Ferit Hoxha. Ngjarja u zhvillua më 24 prill 2026 nëpërmjet komunikimeve në grupin e WhatsApp-it të quajtur “Ambasadorët”.
Sipas Këlliçit, Hoxha kishte shkruar në grup: “po ata idiotët shqiptarë atje çfarë thonë?”, duke iu referuar shqiptarëve të Maqedonisë së Veriut. Pas publikimit fillestar të këtij mesazhi nga Këlliçi, Hoxha e fshiu atë, siç dëshmohet nga foto e re e publikuar nga deputeti demokrat.
Ministria për Evropën dhe Punët e Jashtme deklaroi se mesazhi nuk është i vërtetë. Këlliçi kundërshtoi këtë, duke thënë se gjurmët e komunikimit ekzistojnë ende në grup dhe se Hoxha ka nisur një gjueti për të identifikuar personin që e bëri publik mesazhin.
Në postimin e tij, Këlliçi shkruan: “Ferit, nuk kalohet ky incident i rëndë, kjo shkelje e paprecedentë e etikës duke fshirë mesazhin, ku ke fyer shqiptarët e Maqedonisë së Veriut dhe duke gënjyer me zëdhënës për media. Gjurmët e tua janë aty, tek grupi ‘Ambasadorët’. Jo vetëm e ke bërë atë koment poshtërues, por tani ke nisur gjuetinë e shtrigave për të gjetur personin që nxori mesazhin. Nuk e mbulon dot skandalin me mashtrim. Jep dorëheqjen, është e vetmja mënyrë që të shpëtosh dinjitetin e Institucionit që drejton dhe të korrigjosh dëmin që ke shkaktuar në diplomacinë e Shqipërisë. Çdo orë, çdo ditë më shumë e jotja në krye të Ministrisë së Jashtme është një turp për të gjithë ne”.
Çështja ka nxitur përplasje politike dhe priten reagime të mëtejshme nga institucionet.
Përditësime
Këlliçi kundërshtoi justifikimet e Hoxhës për “time zones të ndryshme” dhe “daljen nga grupet e WhatsApp”.
Në një postim të ri në rrjetet sociale, ai kërkoi kërkim falje publike përveç dorëheqjes.