Ministri i Jashtëm Ferit Hoxha raportoi për më shumë se dy orë në Komisionin Parlamentar për Evropën dhe Punët e Jashtme mbi negociatat për anëtarësimin në BE, raportin IBAR dhe debatin për editorialin e përbashkët të kryeministrit Edi Rama me presidentin serb Aleksandar Vuçiç në media gjermane.
Gjatë diskutimit, deputeti i Partisë Demokratike Belind Këlliçi e pyeti ministrin për konflikt interesi në raportimin mbi institucionet e drejtësisë. Ai përmendi vendimin e GJKKO-së një muaj më parë për masën e sigurimit pasuror ndaj personave në procedimin penal nr. 20/1 të 2025 të SPAK-ut për skandalin e AKSHI-t. Mes emrave u evidentua Gëzim Hoxha, i dyshuar për veprën penale të pastrimit të produkteve të krimit të organizuar.
Këlliçi deklaroi: "A jeni në konflikt interesi në raport me një vendim të bërë publik nga GJKKO një muaj më parë për caktimin e masës së sigurimit pasuror për një sërë personash në skandalin e AKSHI-t, ku prokurorët e SPAK-ut kanë regjistruar emrat e personave ndaj të cilëve po zhvillohen hetime? [...] Nuk mundet që ju të jeni i paanshëm në qëndrimin tuaj ndaj institucioneve të drejtësisë."
Hoxha u përgjigj: "Kam mbështetje të pakushtëzuar për organet e pavarura të drejtësisë. SPAK bën punën e vet dhe unë nuk diskutoj vendimet e SPAK-ut apo të gjykatës. Organet e drejtësisë janë ngritur me konsensus parlamentar. Në lidhje me një hetim të publikuar, respektojmë prezumimin e pafajësisë për gjithkënd. Nuk jam i përfshirë as unë, as familja ime e afërt. Fisi im është i madh; edhe në Malësi të Madhe gjejmë gjysmën e tij. Lincimi publik dhe baltosja nuk më ndalin."