Zgjedhja e Presidentit të Republikës së Kosovës po rikthehet në qendër të debatit politik, në një kohë kur vendi ende ndodhet në fazën e konstituimit të institucioneve të reja pas zgjedhjeve.
Procesi, i cili kërkon konsensus të gjerë politik dhe respektim të procedurave kushtetuese, po shoqërohet me qëndrime të kujdesshme nga partitë parlamentare. Ato theksojnë nevojën për dialog, marrëveshje politike dhe një figurë unifikuese në krye të shtetit. Çështja e kandidaturave dhe mbështetjes ndërpartiake mbetet e hapur.
Deputeti i Partisë Demokratike të Kosovës (PDK), Artan Behrami, për FrontOnline ka deklaruar se PDK nuk mund të flasë për emra konkretë për President, përfshirë Vjosa Osmanin, pa një propozim zyrtar dhe marrëveshje politike ndërmjet subjekteve parlamentare. Ai theksoi se procesi duhet të nisë me propozime të qarta nga partitë, duke veçuar përgjegjësinë e partisë fituese të zgjedhjeve.
"Ne nuk mundemi me fol për një emër i cili akoma zyrtarisht nuk është propozuar nga askush. Ne po presim që partia fituese me propozu emra për President, besoj edhe opozita ka emra për President", u shpreh Behrami.
Sipas tij, zgjedhja e Presidentit nuk mund të bëhet pa marrëveshje politike gjithëpërfshirëse dhe konsensus. "Pa marrëveshje politike nuk e votojmë askënd për President të Kosovës", theksoi ai. PDK nuk pranon imponime, por kërkon dialog dhe kompromis për një figurë që plotëson kriteret kushtetuese dhe shërben si faktor unifikues.
"Nuk pranojmë imponim, pranojmë vetëm dialog dhe kompromise për një figurë unifikuese qysh e kërkon edhe Kushtetuta e Republikës së Kosovës", përfundoi Behrami.
Anëtari i Kryesisë së Lidhjes Demokratike të Kosovës (LDK), Bexhet Xheladini, deklaroi se partia ende nuk ka marrë një qëndrim zyrtar sa i përket zgjedhjes së Presidentit.