Njëmbëdhjetë shoqata dhe organizata shqiptare me bazë në Mbretërinë e Bashkuar i kanë dërguar një letër të hapur Qeverisë dhe Kuvendit të Shqipërisë, përmes së cilës shprehin mbështetjen për protestat që po zhvillohen prej më shumë se një muaji në vend. Ato dënojnë me forcë çdo formë të dhunës, frikësimit apo represionit ndaj protestuesve paqësorë.
Shkrimtarja Lea Ypi e ka shpërndarë këtë qëndrim në rrjetet sociale, duke e cilësuar lëvizjen si një shprehje të demokracisë në veprim dhe të ndërgjegjësimit të shoqërisë civile. Organizatat nënvizojnë se protestat po shërbejnë për mbrojtjen e pasurive natyrore dhe hapësirave publike.
Në dokumentin e publikuar, palët firmëtare kërkojnë realizimin e katër objektivave kryesore:
• Transparencë të plotë për ligjet, vendimet dhe kontratat që prekin mjedisin dhe pasuritë natyrore.
• Llogaridhënie për shitjen ose dhënien me koncesion të pasurive shtetërore, përmes konsultimeve publike dhe mbikëqyrjes parlamentare.
• Vendosjen e interesit publik si parim themelor në politikat e zhvillimit ekonomik.
• Hapjen e një dialogu të vërtetë dhe konstruktiv me përfaqësuesit e shoqërisë civile dhe protestuesit.
Organizatat që kanë firmosur letrën janë: UKAP Foundation, Kosovar Albanian Youth Against Violence, British Albanian Culture & Arts Association, Edinburgh University Albanian Society, Albanian Book Lovers Culture Club, Cambridge Uni Albanian Society, LSE Albanian Society, Diasporas Speaking, UCL Albanian Society, Successful Mothers dhe Gjurmë Iliriane.