Orges Shehi, trajneri i Tiranës, u shpall trajneri më i mirë i muajit prill në kampionatin Abissnet Superiore. Përzgjedhja u bë nga Drejtoria Teknike e FSHF.
Gjatë muajit prill, Shehi drejtoi skuadrën bardheblu drejt një serie pozitive: dy fitore të rëndësishme ndaj Egnatias dhe Partizanit, si dhe dy barazime përballë Flamurtarit dhe Dinamo City. Skuadra nuk regjistroi asnjë humbje në këto ndeshje.
Çmimi “Trajneri i Muajit” iu dorëzua Shehit në ambientet e “Shtëpisë së Futbollit” nga Abdyl Kuriu, drejtor teknik i FSHF.
Në një prononcim për fshf.org, trajneri u shpreh i kënaqur për vlerësimin. Ai theksoi se merita kryesore u takon lojtarëve për angazhimin dhe punën e tyre në fushë.
“Çdo vlerësim të bën të ndihesh krenar dhe ky çmim është për punën e të gjithë muajit. Pavarësisht se e marr unë, i takon djemve që derdhin djersën në fushë dhe kanë bërë maksimumin e tyre. Ky është një çmim simbolik, nuk na jep motivim më të madh. E rëndësishme është të vazhdojmë këtë rrugë, aq më tepër në këtë fazë delikate të sezonit dhe të marrim më të mirën”, deklaroi Orges Shehi.