Organizata për Siguri dhe Bashkëpunim në Evropë (OSBE) deklaroi të premten se rasti gjyqësor ndaj punonjëses së saj Jellena Gjukanoviç ka të bëjë me një individ dhe se respekton vendimin e gjykatës në Prishtinë.
Më 27 prill, Gjykata Themelore e shpalli fajtore Gjukanoviç dhe e dënoi me 6 vjet burgim për spiunazh kundër shtetit të Kosovës. Prokurorët kishin kërkuar 25 vjet burgim, por ajo e mohoi fajësinë gjatë procesit.
Gjukanoviç, nga Mitrovica e Veriut, u arrestua në pikën kufitare të Jarinjës në shkurt të vitit 2025 dhe që atëherë është në paraburgim. Gjykata e shpalli fajtore për bartjen e të dhënave te Agjencia Serbe e Sigurisë dhe Inteligjencës (BIA), duke rrezikuar rendin kushtetues dhe sigurinë kombëtare të Kosovës.
Prokurori special Bekim Kodraliu deklaroi se Gjukanoviç kishte kontakte me dy zyrtarë të BIA-s: Ratko Gajtanoviq, përgjegjës në rajonin e Novi Pazarit, dhe Lubisha Bukviq, me të cilin u takua disa herë në zyrat e BIA-s në Beograd. Ajo kishte shfrytëzuar pozicionin në OSBE nën ndikimin e Aleksandar Vllajiq-it, i dënuar më parë për spiunazh, dhe zyrtarëve të tjerë të BIA-s. Prokuroria theksoi se ajo kishte kontribuar në krijimin e një narrative armiqësore ndaj institucioneve të sigurisë, shtetësisë dhe integritetit territorial të Kosovës.
E pyetur nga Radio Evropa e Lirë, OSBE nuk e komentoi rastin, por nënvizoi se "misioni e respekton rolin e gjyqësorit dhe parimet bazë ligjore të procesit të rregullt ligjor dhe prezumimit, si dhe vendimin e gjykatës".
Së voni, autoritetet kosovare kanë arrestuar disa persona, shqiptarë dhe serbë, për dyshime të ngjashme spiunazhi në shërbim të inteligjencës serbe. Ekspertët kanë thënë se këto raste tregojnë një tendencë.