OSHEE Group ka nënshkruar gjithsej 5 762 aktmarrëveshje për shlyerjen e detyrimeve të prapambetura deri në tetor 2026. Rreth 67% e bizneseve që kanë lidhur marrëveshje kanë zgjedhur ta paguajnë detyrimin me një këst të vetëm, duke përfituar faljen e plotë të kamatëvonesave. Në total, 789 biznese kanë përfituar reduktim të kamatëvonesave. Marrëveshjet mbulojnë detyrimet e krijuara deri më 31 dhjetor 2024.
Sipas të dhënave zyrtare të OSHEE-së, numri i klientëve privatë që kanë zgjedhur shlyerjen me një këst është rritur me 20%, krahasuar me numrin e aktmarrëveshjeve të lidhura mes bizneseve dhe Furnizuesit të Shërbimit Universal (FSHU) deri në gusht të këtij viti. Burime nga OSHEE i thanë “Monitor”-it se një nga faktorët që ka ndikuar në këtë ecuri është lehtësimi i aksesit të abonentëve në platformat digjitale të kompanisë, përmes aplikacionit OSHEE Mobile dhe faqes zyrtare oshee.al.
Uljet e kamatëvonesave
Skema parashikon dy mënyra shlyerjeje: pagesën e menjëhershme, e cila shoqërohet me ulje më të mëdha të kamatëvonesave, ose pagesën me këste. Klientët familjarë përfitojnë 70% ulje, ndërsa për klientët jofamiljarë parashikohet ulje prej 50%. Bizneset e vogla përfitojnë faljen e 100% të kamatëvonesave nëse shlyejnë të gjithë detyrimin me një pagesë të vetme.
Afatet e shlyerjes
Për familjet që trajtohen me ndihmë ekonomike, pensionistët kryefamiljarë dhe personat me status të veçantë, marrëveshjet mund të përfshijnë edhe detyrime të krijuara gjatë vitit 2025. Kësti minimal për këto kategori është 1 200 lekë në muaj, ndërsa shlyerja mund të shtrihet deri në 240 këste. Kusht është që klientët të mos krijojnë detyrime të reja të papaguara gjatë vitit 2026.
Për klientët buxhetorë, jobuxhetorë dhe bizneset, afati është nga 24 deri në 120 këste, në varësi të shumës së detyrimit. Skema përfshin gjithashtu faturat korrektive, përmbledhëse dhe sistemuese, përfshirë rastet që lidhen me demontimin ose testimin e matësve dhe energjinë e akumuluar në to. Këto detyrime mund të shlyhen deri në 24 këste; pagesa e menjëhershme shoqërohet me ulje të kamatëvonesave sipas kushteve të skemës.