Presidentja e Kosovës, Vjosa Osmani, në kazermën "Adem Jashari" në Prishtinë, në 28-vjetorin e Epopesë së UÇK-së, ku u rreshtuan kuadratët e Forcës së Sigurisë së Kosovës (FSK), kujtoi sakrificën e Adem Jasharit dhe familjes së tij.
Ajo theksoi se në këtë tokë të shenjtëruar nga sakrifica, që dikur u dridhte nga krismat e armëve të lirisë, sot qëndron krenare kazerma "Adem Jashari". Ky emër nuk është thjesht emërtim institucional, por amanet dhe përkujtim i përhershëm i komandantit legjendar Adem Jashari dhe familjes Jashari. Në Prekaz, ata e shndërruan shtëpinë në kështjellë rezistence dhe gjakun e tyre në vulë të lirisë dhe pavarësisë.
Vjosa Osmani vlerësoi UÇK-në si zë të popullit të shtypur, organizim të guximit dhe shpresës kundër padrejtësisë, ndërgjegje kombëtare që nuk pranoi të heshtë. Epopeja e marsit 1998 dëshmon se liria fitohet me sakrificë, unitet dhe besim në të drejtën për jetë të lirë në vatrat shekullore.
Ajo deklaroi se krenaria kombëtare marshon sot me FSK-në, trashëgimtare e denjë e UÇK-së. Kjo forcë bart idealin e lirisë, është përgjegjëse për sigurinë e vendit, e trajnuar sipas standardeve më të larta ndërkombëtare, e pajisur me kapacitete moderne dhe trupa profesionalë. FSK-ja është e gatshme të mbrojë atdheun dhe të kontribuojë në misione ndërkombëtare të paqes dhe sigurisë globale.