Vjosa Osmani, presidentja e Kosovës, ka publikuar një video ku paraqet arritjet e Forcës së Sigurisë së Kosovës (FSK).
Në video, Osmani e përshkruan FSK-në si “e fortë, profesionale, aleate e besueshme, e pathyeshme”, duke e quajtur atë “krenarinë tonë, mburojën e atdheut, fuqinë që garanton lirinë”. Ajo thekson se FSK-ja ka treguar se është krenaria e shtetit dhe është e gatshme kurdoherë për të mbrojtur sovranitetin dhe integritetin territorial të Kosovës. Presidentja vlerëson se FSK-ja po marshon fuqishëm përpara si forcë moderne, e mirëpajisur dhe e mirëtrajnuar.
Osmani përmend kontributet e aleatëve në ndërtimin e FSK-së, duke lavdëruar rolin e SHBA-së dhe aleatëve të NATO-s. “Në orët më të errëta, Amerika qëndroi me ne. Ishin ushtarët amerikanë, përkrah aleatëve tanë të NATO-s, që erdhën në Kosovë dhe e shndërruan dëshpërimin në shpresë, frikën në siguri dhe pushtimin në liri”, shprehet ajo. Kjo, sipas saj, është trashëgimia e ushtarit amerikan dhe e SHBA-së për Kosovën.
Ajo veçanërisht përmend gruan e parë që ka arritur gradën Gjeneral Majore në FSK. “Sa më shumë gra në institucione të sigurisë, aq më shumë siguri për të gjithë qytetarët tanë, pa dallim”, deklaron Osmani.
Presidentja rithekson angazhimin për rrugën euroatlantike: “Pavarësisht se sa kompleks është rrugëtimi, ne nuk do të heqim asnjëherë dorë nga rruga jonë drejt BE-së dhe NATO-s dhe organizatave tjera ndërkombëtare. NATO është fati ynë”. Videoja përfundon me fjalët: “Zoti e bekoftë ushtrinë tonë, Zoti e bekoftë Republikën e Kosovës”.