Presidentja e Kosovës, Vjosa Osmani, priti në takim lamtumirës komandantin në largim të Komandës Rajonale Lindje të KFOR-it, kolonelin Jonathan Lloyd nga Garda Kombëtare e Louisianës, si dhe pasuesin e tij, kolonelin Sam Sargeant.
Gjatë takimit, presidentja Osmani e falënderoi kolonelin Lloyd për shërbimin dhe përkushtimin gjatë mandatit të tij në Kosovë. Ajo vlerësoi lart kontributin e tij në forcimin e sigurisë dhe stabilitetit në vend dhe rajon. Në shenjë mirënjohjeje, ajo i ndau një mirënjohje për angazhimin e tij të çmuar.
Më tej, Osmani i uroi mirëseardhje kolonelit Sargeant, duke e siguruar për mbështetjen e plotë nga institucionet e Kosovës në përmbushjen e mandatit të tij dhe të misionit të KFOR-it, të udhëhequr nga NATO.
Presidentja Osmani shprehu mirënjohjen e thellë në emër të popullit të Kosovës për vazhdimin e pranisë së Ushtrisë së Shteteve të Bashkuara në vend si pjesë e misionit të KFOR-it. Ajo theksoi se kjo prani është jetike për paqen, sigurinë dhe stabilitetin në Kosovë dhe rajon. Gjithashtu, nënvizoi se Kosova do të mbetet gjithmonë mirënjohëse ndaj SHBA-së për mbështetjen e palëkundur në të gjitha etapat e saj.
Përditësime
Presidentja Vjosa Osmani mori pjesë në ceremoninë e ndërrimit të komandës në Kampin Bondsteel, ku koloneli Lloyd ia dorëzoi detyrën zyrtarisht kolonelit Sargeant të KFOR-it. Ajo falënderoi kolonelin Lloyd, mirëpriti pasardhësin e tij dhe theksoi se prania amerikane garanton stabilitet afatgjatë si dhe dërgon mesazh të qartë për përkushtimin rajonal.