Presidentja e Republikës së Kosovës, Vjosa Osmani, priti dje në takim drejtorin në largim të Ekipit Këshillues dhe Ndërlidhës të NATO-s (NALT), gjeneral brigade Dr. Sven Lange, si dhe përfaqësuesen e NATO-s, Blanca Hereza Atienza, udhëheqëse e Operacioneve Aktuale në Stafin Ndërkombëtar, Divizioni i Operacioneve në Selinë e NATO-s.
Gjatë takimit u diskutua bashkëpunimi ndërmjet Kosovës dhe NATO-s, si dhe roli i kësaj aleance në ruajtjen e sigurisë dhe stabilitetit në vend. Presidentja Osmani shprehu mirënjohje të thellë për angazhimin e vazhdueshëm të NATO-s në Kosovë.
Ajo vlerësoi mbështetjen e NALT-it në zhvillimin e institucioneve të sigurisë dhe mbrojtjes, veçanërisht në profesionalizimin e Forcës së Sigurisë së Kosovës. Ky bashkëpunim ka ndikuar drejtpërdrejt në forcimin e kapaciteteve profesionale dhe institucionale të saj.
Osmani vlerësoi në mënyrë të veçantë punën dhe përkushtimin e Dr. Sven Lange-s, i cili përmbyll mandatin njëvjeçar si drejtor i NALT-it. Në emër të institucioneve dhe qytetarëve të Kosovës, ajo e falënderoi për kontributin në thellimin e bashkëpunimit ndërmjet Kosovës dhe NATO-s.
Në përfundim, presidentja ritheksoi përkushtimin e Republikës së Kosovës për paqe, stabilitet, vlerat euroatlantike dhe integrimin në NATO.