Presidentja e Republikës së Kosovës, Vjosa Osmani, mirëpriti një delegacion të lartë nga Emiratet e Bashkuara Arabe, të dërguar personalisht nga Presidenti Sheikh Mohamed bin Zayed Al Nahyan. Kjo vizitë pasoi takimin e saj me të javën e kaluar në Abu Dhabi dhe synon diskutimin e mbështetjes së vazhdueshme për sektorin e shëndetësisë, si dhe thellimin e marrëdhënieve dypalëshe përmes projekteve që ndikojnë në mirëqenien e qytetarëve.
Gjatë vizitës, Osmani, së bashku me Ministrin e Shëndetësisë Arben Vitia dhe delegacionin e Emirateve, u prit nga stafi dhe menaxhmenti i QKUK. Ata vizituan gjithashtu Spitalin e Fëmijëve Sheikha Fatima, të ndërtuar me mbështetje nga Emiratet, si dhe lokacionin në Prishtinë ku do të ndërtohet Spitali i ri i Gjinekologjisë. Ky projekt, bazuar në dakordimin paraprak, do të realizohet me mbështetje nga Emiratet.
Delegacioni vizitoi edhe Mitrovicën, ku u prit nga kryetari i komunës Faton Peci. Atje u diskutua një projekt i ri transformues në të mirë të qytetarëve.
Osmani shprehu mirënjohje të thellë për Presidentin Sheikh Mohamed bin Zayed Al Nahyan dhe për Sheikha Fatima Bint Mubarak për mbështetjen, besimin dhe miqësinë ndaj Kosovës.