Presidentja e Republikës së Kosovës, Vjosa Osmani, ka udhëtuar zyrtarisht në Emiratet e Bashkuara Arabe, ku do të marrë pjesë në Samitin Botëror të Qeverisjes. Kjo vizitë synon forcimin e bashkëpunimit ndërkombëtar dhe promovimin e vizionit të Kosovës për zhvillim dhe inovacion.
Zyra e Presidencës njoftoi se Vjosa Osmani është ftuar nga Presidenti i Emirateve, Lartmadhëria e Tij, Sheikh Mohamed bin Zayed Al Nahyan. Në samit do të marrin pjesë liderë nga mbarë bota, me të cilët presidentja do të ketë takime bilaterale për të diskutuar mundësi bashkëpunimi dhe projekte të përbashkëta strategjike.
Gjatë vizitës, Osmani do të marrë pjesë në sesione kyçe, ku do të mbajë ndër fjalimet kryesore. Ajo do të angazhohet gjithashtu në sesione të tjera të forumit dhe tryeza tematike.
Samiti Botëror i Qeverisjes shërben si platformë globale që bashkon liderë politikë, organizata ndërkombëtare dhe kompani për të diskutuar të ardhmen e qeverisjes dhe bashkëpunimit ndërkombëtar.