Presidentja e Kosovës, Vjosa Osmani, në një intervistë për mediumin ndërkombëtar France24, ka hedhur poshtë pretendimet se Ushtria Çlirimtare e Kosovës (UÇK) ishte një lëvizje separatiste. Në përgjigje të pyetjes së gazetarit, Osmani deklaroi: "Sot është 12 qershori, një nga datat më të rëndësishme në historinë e Kosovës, ku jo separatistët siç e përmendët ju, por çlirimtarët, së bashku me mbështetjen e forcave të NATO-s, çliruan Kosovën nga një regjim gjenocidal".
Në të njëjtën intervistë, presidentja foli edhe për zhvillimet e brendshme politike në vend. Ajo nënvizoi domosdoshmërinë e arritjes së kompromisit ndërmjet subjekteve politike, me qëllim krijimin e institucioneve të qëndrueshme shtetërore.
Lidhur me bashkëpunimin politik, Osmani u shpreh e hapur për dialog me të gjitha forcat politike në Kosovë, duke përjashtuar nga kjo mundësi vetëm partinë Lista Serbe.