Osmani: Në Hagë po gjykohen padrejtësisht liria dhe pavarësia e Kosovës

Presidentja e Kosovës Vjosa Osmani foli në promovimin e librit “Kur heshtja flet” të autorit Ahmet Shala, të mbajtur më 16 shkurt 2026 në Prishtinë, në prag të 18-vjetorit të Pavarësisë së Kosovës. Në ceremoni mori pjesë edhe kryeministri i Shqipërisë Edi Rama, në vizitë zyrtare.

Osmani theksoi se Ushtria Çlirimtare e Kosovës (UÇK) është “ideali më i fuqishëm i ndërtuar nga shqiptarët ndër shekuj”. Ajo kujtoi sakrificën e bijve e bijave të Kosovës në kohët më të errëta, që lanë jetën për liri, dhe citoi Ismail Kadarenë, i cili e quajti shtetin e Kosovës “triumf të lirisë dhe të gjithë kombit shqiptar”.

Duke iu referuar gjykimeve në Gjykatën Speciale të Hagës ndaj ish-krerëve të UÇK-së, të trajtuara edhe në libër, Osmani deklaroi se ato janë “gjykim i padrejtë” jo vetëm ndaj personave, por edhe ndaj “proceseve tona jetike, ndaj lirisë dhe pavarësisë sonë, si dhe përpjekjeve për çlirim të ndërmarra në shërbim të lirisë dhe mbijetesës së popullit tonë”.

Ajo nënvizoi se lufta e UÇK-së “nuk ishte akt i impulsit”, por përgjigje ndaj shtypjes dhe padrejtësisë, për dinjitetin dhe mbrojtjen e të pa mbrojturve. “Drejtësia e fiton kuptimin e plotë vetëm atëherë kur është e paanshme dhe e ndërtuar mbi fakte të vërteta, por asnjëherë kur ajo ndërtohet mbi narrativa të rrejshme, të njëanshme dhe me synim për ta rishkruar historinë”, tha Osmani.

Sipas saj, në Hagë po dëshirojnë “ta deformojnë historinë tonë”. “Një histori e shkruar me gjak, asnjëherë nuk mund të fshihet e as të shtrembërohet nga gënjeshtra të shkruara në letër”, shtoi ajo. Libri i Ahmet Shalës, sipas Osmanit, rikthen kujtesën kolektive dhe ngrit ndërgjegjen morale ndërkombëtare për lirinë, drejtësinë dhe dinjitetin, duke kthyer heshtjen në zë të fuqishëm.