Presidentja e Kosovës, Vjosa Osmani, deklaroi të mërkurën se marrja e detyrës si kryetare e Republikës, pesë vjet më parë, nuk ka qenë kulmi i karrierës së saj, por vetëm fillimi.
Këtë e tha ajo në një organizim kushtuar Javës së Gruas në Prishtinë, pak ditë para përfundimit të mandatit të saj si shefe e shtetit. "Pesë vite më parë kur e mora detyrën nuk e pashë si kulm të rrugëtimit tim, por si fillim. Ishte ai moment kur filloi përgjegjësia dhe pushtetin nuk e mora si privilegj, por shërbim", u shpreh Osmani.
Sipas saj, periudha pesëvjeçare në krye të shtetit shërbeu për forcimin e institucioneve dhe shtimin e hapësirës për gratë.
Ajo përmendi gjithashtu një fushatë baltosëse ndaj saj, e nisur kohët e fundit pas shpërndarjes së Kuvendit me dekret presidencial. Edhe pse nuk përmendi emra, Osmani tha se propaganda mund të kthejë dikë në tradhtare brenda natës, çka rrezikon demokracinë. "Në javët e fundit puna ime është shfaqur me një fushatë baltosëse. Është përpjekja për të zhveshur një njeri nga dinjiteti njerëzor. Kur propaganda mund të kthejë këdo në tradhtare brenda natës, atëherë e tërë demokracia është në rrezik", deklaroi ajo.
Përditësime
Vjosa Osmani theksoi se presidenca shënon "kalimin nga përfaqësimi në përgjegjësi" dhe se "lidershipi me integritet nuk është dobësi, por standard".
Ajo akuzoi fushatën baltosëse se synon ta kthejë në "objekt dhe ta krahasojë me kafshët më të egra", duke "zëvendësuar të vërtetën me imazhe të manipuluara".
Albulena Haxhiu, kryetare e Kuvendit, mori pjesë në event dhe deklaroi se do të fuqizojë legjislativin.