Vjosa Osmani, presidente e Republikës së Kosovës, priti më 12 shkurt 2026 në takim të ngarkuarën me punë të Shteteve të Bashkuara të Amerikës në Kosovë, Anu Prattipati.
Sipas njoftimit të Presidencës, gjatë takimit u diskutuan zhvillimet e fundit politike në vend. Theksi u vu te procesi i konstituimit të Kuvendit dhe formimit të Qeverisë, si dhe rëndësia e përmbylljes së proceseve kushtetuese dhe e konsolidimit institucional. Këto hapa synojnë stabilitetin demokratik, zhvillimin e vendit dhe adresimin e nevojave të qytetarëve.
Palët diskutuan po ashtu për rolin e Kosovës në Bordin e Paqes, të themeluar nga presidenti i SHBA-së Donald Trump, ku Kosova është anëtare themeluese, si dhe për hapat e mëtejshëm në këtë drejtim.
Në këtë kontekst, Vjosa Osmani ritheksoi përkushtimin e palëkundur të Kosovës për linjëzim të plotë me Shtetet e Bashkuara të Amerikës, në përputhje me interesat strategjike të vendit. Ajo nënvizoi gjithashtu thellimin e vazhdueshëm të bashkëpunimit ndërmjet dy vendeve.