Kandidati i Partisë Demokratike të Kosovës (PDK), Fetah Paçarizi, ka humbur 5.942 vota pas rinumërimit të pjesshëm të votave nga Komisioni Qendror i Zgjedhjeve (KQZ) në zgjedhjet e parakohshme parlamentare të 28 dhjetorit.
Me mbi gjysmën e procesit të përfunduar, rinumërimi ka zbuluar mospërputhje të shumta te disa kandidatë, të cilët kishin rezultuar me mijëra vota më shumë në numërimin fillestar.
Paçarizi ka reaguar publikisht në Facebook, duke e cilësuar situatën shqetësuese për integritetin e procesit zgjedhor. Ai deklaroi se zhvillimet ngrenë dyshime mbi korrektësinë e numërimit dhe rinumërimit, duke cenur besimin e qytetarëve.
Ai kërkoi rinumërim të plotë të votave në të gjithë vendin, përfshirë votat e diasporës, për të garantuar transparencën, barazinë dhe respektimin e vullnetit të votuesve. Gjithashtu, bëri thirrje që Prokuroria e Shtetit të nisë hetime të plota, të pavarura dhe profesionale.
Paçarizi sqaroi se është i përfshirë rishtas në politikë dhe nuk ka mbajtur kurrë poste apo përgjegjësi politike. Ai mohoi çdo ndikim në procesin zgjedhor dhe u distancua plotësisht nga keqpërdorimet ose manipulimet e mundshme të votës.
Sipas tij, KQZ, si institucion i pavarur kushtetues, duhet të japë llogari publike dhe të ofrojë prova të qarta për ligjshmërinë dhe korrektësinë e veprimeve të saj. "Pavarësia institucionale nuk nënkupton mungesë përgjegjësie. Gabimi apo manipulimi i këtij niveli është përgjegjësi shtetërore", theksoi Paçarizi.
Rinumërimi ka nxjerrë në pah devijime të mëdha, veçanërisht në Prizren, ku Paçarizi rezultoi me numrin më të lartë të votave të tepërta në numërimin fillestar.
Përditësime
Nait Hasani humbi 2.774 vota pas rinumërimit.
Kujtim Gashi humbi 1.977 vota pas rinumërimit.
Paçarizi postoi më 28 dhjetor, ditën e zgjedhjeve, duke kërkuar proces të rregullt.
PDK deklaroi se çdo cenim është i papranueshëm dhe pret konkluzionet zyrtare.